Vispop: Ang Tingog sa Bag-ong Bisaya

POSTER sa ikatulong season sa Vispop. (Hulagway gikan sa ilang Facebook.)

Sa panahon nga halos matag butang nahisuwat ug madunggan sa Iningles, misikat ang KPop (Korean Pop) sa atong nasod. Mga batan-on nga nagdako sa pinulongang Iningles nanag-awit sa mga kantang Kinoryano ang liriko ug pipila lamang nila ang nakasabot gyod sa ilang gipangtabi. Ang ilang playlist sa Spotify (usa ka app alang sa pagpaminaw og musika) napuno sa langyawng mga playlist nga sagad KPop o mga mang-aawit sa Amerika. Sa laing bahin, komosta na sad kaha ang mga kantang nahisuwat sa pinulongang Sinugboanon? 

Kapin sa tulo ka tuig na ang minglabay dihang namugna ang Vispop nga gipasiugdahan ni Jude Gitamondoc. Sukad sa pagdaog sa kantang "Duyog" ni Jewel Villaflores, daw nabanhaw ang musikang Binisaya nga mihinay human sa kasikatan sa Bisrock nga gipangunahan na bandang Missing Filemon ni Insoy Niñal. Nasundan ang unang season sa Vispop ug midaog ang kantang "Labyu Langga" ni Jerika Teodorico, usa ka tinun-an sa Cebu Normal University. Ang iyang bespren nga nagtungha sa UP Cebu, si Lourdes May Maglinte, nga nagkanta sa "Buwag Balik" ug kompositor usab sa kantang "Laylay" nga gi-perform ni Chai Fonacier atol sa unang season sa Vispop ang midaog sa bag-ohay lang natapos nga ikatulong season sa Vispop. 

Ang nakanindot sa Vispop tungod kay dili kinahanglan modaog aron masikat ang usa ka kanta ngadto sa mga batan-on ug mga Bisaya. Kon inyong nabantayan, mas gipabug-atan nako ang mga batan-on tungod kay mao kini ang samang henerasyon nga naadik sa langyawng KPop. Ang beat sa mga musikang sagad madunggan lamang nila sa mga langyawng awit miabot na usab sa mga kantang Binisaya nga gikan sa Vispop sama sa "Intergalactic Gugma" nilang Tony Alfonso ug Kaye Dinauto. Ang 'dili kinaraan' nga areglo sa mga kantang ming-abot sa paynals sa Vispop ang hinungdan nganong daghang mga batan-on ang nakasag-u sa liriko niini ug gani nag-top man sa mga weekly countdown sa radyo. Ang mga mingsikat nga kanta gikan sa Vispop bisan wala makadaog mao ang "Balay ni Mayang" ni Martina San Diego ug Kyle Wong, "Pa-pictura ko Nimo, Gwapo" ni Marie Maureen Salvaleon, "Dili Pa Panahon" sa Freon ug ni Kenneth Corvera, "Bok Love" ni Therese Marie Villarante ug Kurt Fick, "LQ (Sige Lag Away)" nilang Eugene Corpin ug Julyann Uy ug "Brgy. Blues" ni Earl Andrei Ornopia.

Ang kantang "Tug Ta Tug" nga reggae ni Earnest Hope Tinambacan nga may bandang Hopia mingsalmot usab sa ikatulong season sa Vispop. Sa unom ka kanta, siya ang milahi ug usa sa mga mingtatak sa akong panumdoman. Bibo kini ug kalma panimawon. Bisan wala makadaog, madunggan gihapon kini sa mga istasyon sa radyo tungod kay ubay-ubay sab sa mga Bisaya ang giganahan niining kantaha. Daw siya ang Budoy sa bag-ong panahon. Ug usa ka multi-talented artist kini si Hope nga miyembro sa Hopia tungod kay may mga kanta sila sa Spotify sama sa "Abby Ko," "Bulan-bulan," ug "Gugma Korni Ba?" nga bugnaw sa dunggan. Kon tingali nasalmot pa kini niya sa Vispop may purohan nga makahuna og daghang atensiyon. 

Usa pa misalmot si Hopia sa Vispop 3.0, nalingaw nako sa iyang mga kanta sa Spotify. Nahibaw-an nako nga may mga gipang-upload siyang kanta sa Spotify tungod sa Facebook post kanhi ni Insoy. Sa dihang gisuwayan nakog paminaw ang iyang mga awit, nalingaw ko ug wala magduha-duha nga iapil kini sa akong playlist sa Spotify nga "Bag-ong Bisaya." Mamahimo kini nimong ma-search ug apil sa nagkadaghan nga mi-subscribe usab niining maong playlist, gani kapin na man sa 300 ang mingsunod niini. 

BAG-ONG BISAYA. Subscribe na sa Spotify!

Sa "Bag-ong Bisaya" nga playlist, inyong madunggan ang tanang mga kanta gikan sa tulo ka sa season sa Vispop, mga awit nga gipauso sa bandang Missing Filemon, ug sa laing Bisaya nga mang-aawit nga nagpasikat sa kantang "Baboy" nga si Enchi. 

Sa panahon nga daghang mga batan-on ang ganahan gani maminaw sa mga kantang wala sila makasabot sa tanang liriko, dia buhi pa ang Binisayang musika ug nagtikaw-tikaw pa intawon sa modernong panahon.